Brittanje vaar uit teen 'lafhartige' Nigerië-aanvalle
2011-12-25 21:32
Londen – Die Britse Minister van Buitelandse Sake, William Hague, het Sondag die “lafhartige” bomaanvalle op Kersdag op kerke in Nigerië veroordeel.
Minstens 32 mense is in dié aanvalle dood.
“Ek veroordeel vandag se bomaanvalle in of naby kerke in Nigerië,” het Hague in ‘n verklaring gesê.
“Hierdie is lafhartige aanvalle op families wat in vrede en gebed saamkom om ‘n dag te vier wat harmonie en welwillendheid teenoor andere simboliseer. Ek spreek my medelye met die families en die beseerdes uit.”
‘n Woordvoerder vir die Islamistiese groep Boko Haram het verantwoordelikheid aanvaar vir die mees dodelike aanval, by ‘n kerk buite die hoofstad, Abuja, waarin 27 mense dood is.
Nog drie bomme het op Kersdag in dié land ontplof.
- Volg Nuus24 op Twitter
- Sapa - AFP