Brandstoftekort het Tripoli in wurggreep
2011-07-14 08:18
Tripoli – Die inwoners van Tripoli, Libië se hoofstad, is in ’n desperate wurggreep weens tekorte aan brandstof, elektrisiteit en kos.
Terwyl “afvaardigings” van Muammar Gaddafi wêreldwyd by regerings gaan aanklop om oor Gaddafi en die land se toekoms te onderhandel, kan geeneen van hulle blykbaar die versekering gee dat hy van sy mag sal afstand doen nie.
Ingeligtes in Tripoli het Woensdag aan Beeld gesê motors staan oral langs die strate verlate en sonder brandstof. Diesel is nog beskikbaar, maar nou ry mense met kanne diesel na die Tunisiese grens, waar hulle dit vir petrol gaan ruil.
Gas vir die reuse-turbines wat die stad van elektrisiteit voorsien, is vinnig besig om op te raak en daar is geen aanduidings dat nuwe voorrade op pad is nie. Sanksies verbied enige land om met Libië handel te dryf.
“Met ’n klassieke knyptangbeweging het die rebelle nou die toevoerroetes na die hoofstad afgesluit. Gaddafi se troepe en ondersteuners op die platteland kan nie naby die stad uitkom nie en niemand in die stad kan op die platteland uitkom nie.
“Die rebelle het die brandstofpypleiding na die stad afgesny en na die ooste van die land herlei.
“’n Mens hoor ook al hoe meer van misdaadvoorvalle waar mense deels uit desperaatheid begin steel en voertuie kaap. Wapens is vryelik in omloop, want Gaddafi het gedink deur wapens uit te deel, gaan die mense hom verdedig.”
Volgens Beeld se bron is kosvoorrade en vars water die volgende wat opdroog.
Alain Juppe, die Franse minister van buitelandse sake, het volgens Sapa-AP gesê Libiese afvaardigings wat met Frankryk, die VSA, Turkye, Rusland en verskeie ander lande se regerings gaan onderhandel, het nie een ’n mandaat om die versekering te gee dat Gaddafi wel van sy mag sal afstand doen nie. Hulle beweer net hy sal.
Gaddafi het reeds aangedui dat hy buite die vredesonderhandelingsproses sal staan, maar nie dat hy sy mag sal prysgee nie. Die rebelle stel dít egter as voorwaarde.
– Volg Nuus24 op Twitter.
- Beeld