Botswana moet help ná 'stropers' se dood
2012-08-15 13:36
Botswana is versoek om sy volle samewerking aan die Namibiese polisie te gee in die ondersoek na die omstandighede waaronder twee beweerde wildstropers uit die Caprivi deur lede van die Botswana weermag (BDF) in die Chobe nasionale park doodgeskiet is.
Dit volg nadat die ministerie van buitelandse sake die hoë kommissaris van Botswana, Gobopang Duke Lefhoko, ontbied het om te verduidelik wat op 17 Julie gebeur het toe die twee mans geskiet is.
Die twee, wat intussen as Nyambe Nyambe en Munguni Siyanga Richard geïdentifiseer is, het na bewering die grens na Botswana in die nag met ’n mokoro (selfgemaakte kano) oorgestreek om onwettig in die buurland te gaan jag.
Amb. Veiccoh Nghiwete, permanente sekretaris van Buitelandse Sake, sê in ’n verklaring sy ministerie is deur Lefhoko in kennis gestel dat die polisie van Namibië en Botswana se gesamentlike ondersoek na die voorval steeds voortduur.
“Die Ministerie het ’n beroep op Botswana gedoen om terwyl die gesamentlike ondersoek aan die gang is, sy volle samewerking aan die Namibiese polisie te gee.
“Die ministerie het ook beklemtoon dat hoewel albei lande teen stropery gekant is, dit belangrik is dat beide kante maksimum selfbeheersing aan die dag lê om lewensverlies te voorkom.”
Mgeni Online het intussen berig dat kol. Paul Sharp, openbare skakelbeampte van die Botswana weermag, erken het die stropers is in die Ihahagebied land die Choberivier doodgeskiet.
Volgens hom is dit die eerste voorval in ’n baie lang tyd waarin die bekamping van stropery tot lewensverlies gelei het.
– Republikein.
– Volg Nuus24 op Twitter.
