Botswana-dorp al 2 maande sonder water
2011-10-18 09:18
Pretoria – Vloedwater en die plaaslike regering in Maun, Botswana, se besluitloosheid oor hoe om ’n beskadigde waterpypleiding te herstel, laat dié snels groeiende dorp in Botswana nou al die afgelope twee maande sonder huishoudelike water.
Volgens Norman Chandler, ’n Suid-Afrikaner wat reeds etlike jare deel is van die sowat 200 Suid-Afrikaanse families in die gemeenskap, sê die watertekort is besig om die dorp tot stilstand te bring.
Dit het nie net ’n uitwerking op die sakekant van bedrywighede nie, maar ook op toerisme, wat een van die belangrikste bronne van inkomste vir die inwoners is.
Die probleem het twee maande gelede ontstaan toe vloedwater uit die Thamalakane-rivier ’n verstopping in ’n waterpypleiding tussen Maun en Toteng, 80km verder, veroorsaak het.
Die plaaslike departement vir paaie en water-aangeleenthede het die verstopping oopgemaak, waarna die krag van die water die pype en die pad oor die pypleiding aan stukke geruk het.
Dit het voetgangers en verkeer in albei rigtings drie dae lank ontwrig. Bootjies is gebruik om toeriste oor die water na Maun te vervoer, terwyl toerbusse en motors aan die ander kant gestrand was.
Die plaaslike amptenary het die “oorstroming” probeer oplos deur honderde tonne sand aan te ry om die pad te herstel, maar moes die hulp van ’n private kontrakteur inroep om te gaan help.
Die plaaslike regering en die kontrakteur sal ook saamspan om die bogrondse pypleiding te herstel sodat die watertoevoer aan die 55 000 gesinne in die dorp hervat kan word.
Die inwoners in informele nedersettings is noodgedwonge aangewese om die modderwater uit die rivier te gebruik, terwyl inwoners met boorgate teen ’n prys water aan die res van die dorp verskaf.
Die Botswana-regering het volgens Chandler reeds die situasie as ’n “verleentheid” bestempel, veral in die lig van die massiewe silwer- en kopermyn wat van volgende jaar af in die omgewing oopmaak. Dít is veronderstel om groot voorspoed vir die gemeenskap te bring.
– Volg Nuus24 op Twitter.
- Volksblad