Boko Haram verantwoordelik vir ontploffings

2012-01-21 12:30

Kano – Die radikale Islamitiese groep Boko Haram het aanspreeklikheid aanvaar vir die dood van minstens sewe mense in 'n vlaag ontploffings in Kano in die noorde van Nigerië.

Amptenare sê dit was gekoördineerde aanvalle op sowat vier geboue.

In die eerste aanval het 'n selfmoordbomaanvaller hom in sy motor by die polisiehoofkwartier in Sharada opgeblaas.

Kort daarna was daar 'n ontploffing by nog 'n polisiestasie en ander regeringsgeboue.

Die Boko Haram het die afgelope paar weke verskeie aanvalle uitgevoer en sedert Kersdag die dood van minstens 50 mense veroorsaak.

Die groep val dikwels polisiestasies aan, omdat hulle die polisie aanspreeklik hou vir die dood van hulle voormalige leier twee jaar gelede.

Die groep eis ook dat Sharia-wette in Nigerië ingestel moet word. 

– RSG.

– Volg Nuus24 op Twitter.