Boko Haram val militêre patrollie aan
2011-10-10 13:14
Kano – ‘n Bom wat vermoedelik deur die gewelddadige Boko Haram-sekte geplant is, het Sondag naby ‘n militêre voertuig in die Borno-staat van Nigerië ontplof.
Die bom is naby ‘n pad in die Gwange-gebied in Maiduguri geplant en het ontplof terwyl ‘n militêre patrollievoertuig verby gery het.
Daarna het aanvallers op die patrollie begin skiet, het Simeon Midenda, die polisiehoof van Borno, gesê.
“Alle bewyse dui daarop dat die militêre patrollievoertuig die teiken van die aanval was omdat die bom ontplof het op die oomblik wat die voertuig verby gery het,” het Midenda gesê.
‘n Skietgeveg tussen die weermag en die aanvallers het gevolg, maar niemand is in die skermutseling beseer nie, het hy gesê.
Die omgewing waar die aanval plaasgevind het, is afgebaken maar niemand is nog in verband met die aanval in hegtenis geneem nie.
– Volg Nuus24 op Twitter.
- Sapa - AFP