Boer, vrou uit huis in Zim gesit
2011-08-15 08:13
Janice Keoghen, Louise Ferreira
Johannesburg – “Dit mag dalk die laaste brief wees as hulle ons afsny. Bid asseblief.”
Só het Alida du Toit, ’n boervrou van die Nyazura-omgewing in die ooste van Zimbabwe, haar laaste e-pos aan familie en lede van haar gebedskring afgesluit voordat ondersteuners van kommodoor Innocent Chiganze van die Zimbabwiese lugmag onder meer hul rekenaars gesteel het.
Dit was deel van ’n poging om Du Toit (63), haar man, Dolf (67), en stiefseun, Rudolph (38), uit hul huis op die plaas Excelsior te sit. Hulle was sedert Vrydag 08:00 in die huis vasgekeer.
Hulle is Saterdagaand deur Zimbabwiese polisie van hul plaas begelei en was na die kliniek in Mutare op pad.
“Die polisie het hulle kans gegee om hul goedjies te pak,” het Du Toit se dogter, Marie Fernandes van Pretoria-Noord, gesê.
“Dit was vreedsaam.
“Hulle is baie deurmekaar, maar hulle is veilig.”
Volgens Fernandes was daar by tye tot 80 mense om die huis wat vir hulle geskree het om uit te kom. Hulle het klippe na die huis gegooi en sommige mense was met ysterstawe gewapen.
“My ma het gebel en gesê ons moet bid, hulle het vensters gebreek en klippe gegooi.
“My ma-hulle het in die gang weggekruip.
“Dit het gebeur terwyl ek met haar gepraat het. Ek kon hoor hoe hulle gegooi word.”
Volgens Fernandes was party van die klippe so groot dat haar ma nie haar hande daarom kon sit nie. Dolf du Toit is met ’n klip teen sy kop getref.
Vrydagoggend het die groep probeer om ’n veiligheidshek met ’n trekker af te breek. Toe hulle nie daarin kon slaag nie, het hulle een van die vensters van die kantoor gebreek en die gesin se rekenaars gesteel. Volgens Fernandes het hulle ook op vragmotors gekom en begin om masjinerie weg te ry.
Die Du Toits het aangehou bid en saam Nagmaal gebruik.
Vrydagaand het van die mense deur die dak van die huis by die linnekamer ingekom en alles daarbinne uitgedra.
Teen Saterdagoggend het die ongeduldige indringers probeer om die deure met ysters af te breek.
“Hulle het gedreig om my ma seksueel aan te rand en hul koppe inmekaar te slaan,” het ’n ontstelde Fernandes aan Volksblad gesê.
Volgens Fernandes het die groep vir die polisie gesê haar ma het pres. Robert Mugabe gevloek en moet in die tronk gesit word.
Clayson Monyela, woordvoerder van die Suid-Afrikaanse departement van internasionale betrekkinge en samewerking, het gister aan Volksblad gesê hulle is bewus van die situasie en is saam met die Suid-Afrikaanse ambassade in kontak met die Du Toits.
– Volg Nuus24 op Twitter.
- Volksblad