Boer, staat se geveg oor Zim weer in hof
2010-12-23 07:35
Beeld
Johannesburg - Die volgende ronde van die geveg tussen die Suid-Afrikaanse regering en die skatryk Vrystaatse boer Crawford von Abo oor Von Abo se uitgebreide boerderybelange in Zimbabwe word op 28 Februarie in die appèlhof voor vyf appèlregters uitbaklei.
Von Abo, wat volgens sy regspan skade van sowat R500 miljoen in Zimbabwe gely het weens dié land se beleid oor grondhervorming, het reeds in Februarie in die hooggeregshof in Pretoria ’n belangrike sege teen die regering behaal.
Daar het regter Bill Prinsloo beslis dat die regering Von Abo se skade moet vergoed toe die Zimbabwiese regering beslag gelê het op sy belange, wat bees-, tabak- en mielieplase insluit.
14 van sy plase is onder hom uitgevat.
Die regering het teen Prinsloo se uitspraak appèl aangeteken.
Appèlregters L. Mpati, T. Cloete, S. Snyders, E. Theron en W. Plasket sal op 28 Februarie mondelinge betoog van die regering en Von Abo aanhoor, is gister aan Beeld bevestig.
Een van die vrae waaroor die appèlregters duidelikheid wil hê, is of die regering Von Abo se pleidooi om diplomatieke beskerming “rasioneel, behoorlik en in goeie trou” oorweeg het en, indien wel, of dié optrede van die regering met bepalings in die Grondwet bots.
Wat ook al die uitspraak in die appèlhof is, word verwag dat die verloorder aansoek om appèl in die konstitusionele hof sal doen weens die belang van die saak.
Die hofgevegte word in boerdery- en landboukringe fyn dopgehou omdat verskeie ander Suid-Afrikaanse eienaars van plase in Zimbabwe ook van hul grond ontneem is.
As die uiteindelike beslissing in Von Abo se guns is, kan dit die sluise oopdraai vir soortgelyke eise teen die regering.
- Volg Nuus24 op Twitter.