Bob slyp mes vir Bennett
2009-11-11 10:32
Tangai Chipangura
Harare – In ’n klaarblyklike poging om Morgan Tsvangirai, sy premier, verder te frustreer, het pres. Robert Mugabe Johannes Tomana, sy omstrede prokureur-generaal, beveel om self die aanklaer te wees in die terreurverhoor van Roy Bennett, Zimbabwe se aangewese adjunkminister van landbou.
Mugabe weier sedert 11 Februarie vanjaar – toe die eenheidsregering (RNE) ingestel is – om Bennett, wat deur Tsvangirai aangewys is, in te huldig.
Tomana is op sy beurt een van Mugabe se eensydige aanstellings wat Tsvangirai onlangs genoop het om kabinetsittings te boikot.
Tomana is ook aan die voorpunt van die verskerpte optrede om die oorblywende wit boere in Zimbabwe te vervolg en van hul plase te verdryf.
Tomana het sedert sy aanstelling in Februarie alles in sy vermoë gedoen om Bennett te vervolg. Hy is in ’n stadium in haglike omstandighede in ’n tronk in Mutare aangehou.
Toe Bennett wel later op borgtog vrygelaat is, het Tomana talle aktiviste van Tsvangirai se beweging vir demokratiese verandering (MDC) laat toesluit en teister.
Te midde van die polemiek rondom Bennett se nuwe verhoor het Tomana opdrag gegee dat dat vier leiers van die Zimbabwiese Kongres van Vak-unies (ZCTU), onder wie Lovemore Matombo, ZCTU-leier, by Fort Victoria gevange geneem word op aanklag dat hulle vergaderings gehou het sonder om die polisie daarvan te verwittig. Matombo het sterk bande met Cosatu in Suid-Afrika.
Cosatu en talle menseregte-organisasies eis Matombo en sy makkers se onmiddellike vrylating. In ’n brief aan Mugabe sê die Internasionale Konfederasie van vakbonde in Afrika (ITUC-Africa), waarvan Cosatu ’n lid is, die ZCTU-groep se “arbitrêre inhegtenisneming en onwettige aanhouding” en vergrype teen vakbondlede kwel hom.
- Beeld