Bewyse dat Gaddafi se Hana nog lewe
2011-08-30 21:53
Tripoli – Sedert die oorname van Tripoli is daar al hoe
meer bewyse wat na vore kom dat Gaddafi se aangenome dogter, Hana, nié tydens ‘n
Amerikaanse lugaanval in 1986 oorlede is nie.
Amerika het in 1986 ‘n lugaanval op Gaddafi se
kamp in Tripoli geloods ná ‘n Libiese bomaanval in Berlyn waartydens twee Amerikaanse soldate dood is.
Gaddafi het destyds ‘n foto van sy dogter,
Hana, aan joernaliste gewys en gesê dat sy tydens die aanval oorlede
is.
Rebellemagte wat Tripoli en Bab al-Aziziya
oorgeneem het, het Hana se geboortesertifikaat en ‘n foto van ‘n jong
vrou met die naam “Hana” agterop geskryf in een van die kamers gevind.
Dit wil dus voorkom dat Hana nooit tydens die
1986-lugaanval dood is nie.
Sedertdien het verskeie bronne bevestig dat
Hana nog lewe.
‘n Hospitaalamptenaar in Tripoli het gesê dat Hana tot
en met die onluste begin het as ‘n dokter in sy hospitaal gewerk.
Owerhede in Switserland het ook bevestig dat
Hana se naam op ‘n sanksies-lys in dié land verskyn het.
Baie Libiërs glo Hana lewe nog, maar daar is
ook diegene wat beweer dat Gaddafi ‘n tweede dogtertjie aangeneem het en haar
óók Hana genoem het, ter herdenking van die Hana wat in 1986 oorlede is.
Volg Nuus24 op Twitter.
- Sapa - AP