Bevolkingsgroei in Botswana waarskynlik Zim se skuld
2011-09-30 10:24
Gaborone – Botswana se bevolking het in die laaste dekade met 21% tot twee miljoen mense gegroei, het dié land se nasionale statistieke-diens Donderdag ná die nuutste sensus gesê.
“Ons het die twee miljoen-kerf bereik. Dit het Botswana 28 jaar geneem om sy bevolking met een miljoen te laat groei. Die land het in 1983 ‘n bevolking van slegs een miljoen gehad,” het Anna Majelantle, hoof van die diens, gesê.
Majelantle het gesê die rede vir die aansienlike toename sal eers oor ses maande, wanneer die ontleding van die sensus bekendgemaak word, duidelik wees.
Duisende Zimbabwiërs het die afgelope dekade oor die grens na Botswana gevlug in ‘n poging om die ekonomiese krisis in hulle tuisland te ontvlug.
Majelantle het gesê die bevolkingsgroei is goed vir sakemense en potensiële beleggers in Botswana, wat nou ‘n groter mark vir hulle produkte het.
– Volg Nuus24 op Twitter.
- Sapa - AFP