Besnydenisring knip Vigs dalk kort
2010-02-16 05:23
Londen - 'n Nuwe besnydenisring wat deur wetenskaplikes in China ontwerp is, is moontlik besig om 'n effektiewe wapen in Afrika se stryd teen MIV/Vigs te word.
Die ShangRing is suksesvol op 'n klein groep mans in Kenia getoets, en die projek is reeds $4 miljoen (sowat R31 miljoen) deur Bill en Melinda Gates se liefdadigheidsinrigting belowe.
Toetse sal na verwagting vandeesweek op 'n groter skaal uitgevoer word.
Volgens een Keniaan, wat slegs as Christopher wou bekendstaan, is die prosedure verbasend pynloos, selfs al moet die ring vir 10 dae gedra word.
"Ek dink dit is die beste manier om myself teen siektes soos Vigs te beskerm," het hy gesê.
Wetenskaplikes meen besnydenis verminder die kanse van verspreiding van MIV omdat die voorvel besonder vatbaar is vir dié virus.
Besnydenis is egter 'n probleem in Afrika, waar lande dikwels 'n tekort aan mediese personeel en fasiliteite het.
Volgens mediese data uit China is daar komplikasies in slegs 5% van gevalle waar die ShangRing gebruik word.
Tradisionele besnydenisse in Afrika veroorsaak volgens die data komplikasies in soveel as 15% van gevalle.
'n Chirurgiese besnydenis neem sowat 20 minute, terwyl 'n ShangRing-besnydenis slegs 5 minute vat.
Sewentig persent van die wêreldwye MIV-positiewe bevolking woon in Afrika.
- Sapa-AP