Besluit oor lasbrief vir Gaddafi kom gou
2011-06-27 08:36
Den Haag – Regters van die internasionale strafhof sal Maandag besluit of 'n lasbrief vir die inhegtenisname van Muammar Gaddafi, die Libiese leier, uitgereik sal word.
Regter Sanji Mmasenono Monageng sal na verwagting om 13:00 Suid-Afrikaanse tyd bekendmaak of 'n versoek deur die internasionale strafhof in Den Haag se aanklaer om die Libiese leier en twee van sy medewerkers vir misdade teen die mensdom in hegtenis te neem, suksesvol was.
Die internasionale strafhof se aanklaer het 'n versoek ingedien vir lasbriewe vir die inhegtenisname van Gaddafi, 69, sy seun Seif al-Islam, 39, en die hoof van die Libiese intelligensiediens, Abdullah al-Senussi, 62, vir moord en vervolging sedert middel Februarie, toe opstande in Libië uitgebreek het.
Regters kan vandag besluit om die lasbriewe uit te reik, om die versoek af te keur, of om meer inligting aan te vra voor hulle hul finale besluit maak.
– Volg Nuus24 op Twitter.
- Sapa - AFP