Bennett wil leuens, bedrog in Zim verklap
2010-05-11 14:26
Johannesburg – Roy Bennett, die wit boer en aangewese adjunkminister van landbou van Zimbabwe, wat Maandag op alle aanklagte teen hom vrygespreek is, sê hy sal die “leuens, bedrog en diefstal” in Zimbabwe onthul nadat hy as adjunkminister van landbou aangestel word.
“Wanneer jy met mense werk wat in donker hoekies wegkruip – mense wat ander doodmaak en deur absolute vrees heers en vermoor... die grootste ding wat hulle vrees is ‘n lig wat in daardie donker hoeke skyn. Hulle vrees ook waarheid en eerlikheid,” het die 53-jarige Bennett aan Suid-Afrika se Radio 702 vertel.
Wanneer hy as adjunkminister van landbou aangestel word, sal hy baie van die leuens, bedrog en diefstal kan ontbloot wat in Zimbabwe plaasvind, meen Bennett.
Die MDC-party het Maandag ná die uitspraak daarop aangedring dat Bennett Dinsdag as adjunkminister ingehuldig word.
Bennett se hofsaak was een van die kwessies wat die koalisie-regering bedreig het.
- AFP
Volg Nuus24 op Twitter.