Bashir belowe verhouding met Weste
2010-05-28 14:28
Khartoem – Omar al-Bashir, die president van Soedan, het Donderdag by sy inhuldiging gesê hy sal ‘n goeie verhouding met die Weste hê ten spyte van die internasionale strafhof wat ‘n lasbrief teen hom het.
Bashir het verlede maand ‘n veelpartyverkiesing gewen nadat hy 21 jaar terug tydens ‘n militêre oorval mag verkry het.
Hy het tydens die inhuldiging gesê hy sal veg vir eenheid in Soedan.
Bashir het die parlement tydens ‘n seremonie toegespreek wat deur ses staatshowe van Afrika bygewoon is, asook ‘n paar verteenwoordigers van Westerse lande.
“Ek sal persoonlik daarin streef om ‘n dialoog, ‘n objektiewe dialoog, met Westerse state te bou...” het hy gesê.
In Maart 2009 het Bashir die eerste sittende staatshoof geword wat deur die internasionale strafhof beskuldig word.
Hy staan tereg op aanklagte van oorlogsmisdade en misdade teenoor die mensdom in Darfoer.
Sy beweerde misdade sluit onder andere moord, uitroeiing, marteling, verkragting en twee klagtes van oorlogsmisdade in.
- AFP
Volg Nuus24 op Twitter.