Amerikaners in Nigerië gewaarsku oor aanvalle
2012-09-13 17:13
Lagos – Die Amerikaanse ambassade in Nigerië het Amerikaners Donderdag gewaarsku om ekstra versigtig te wees ná dreigemente en aanvalle deur ekstremiste groepe en geweld in Libië en Egipte.
"Die noodboodskap" is uitgereik aan Amerikaners wat in Afrika se mees digbevolkte land woon en volg nadat militante die Amerikaanse konsulaat in Benghazi aangeval het. Die Amerikaanse ambassadeur en drie ander Amerikaners is in die aanval dood.
"Ekstremiste kan dalk poog om Amerikaners en ander Westerlinge in Nigerië te teiken," het die ambassade in 'n verklaring gesê.
Die ambassade het verder gesê aanvalle deur radikale groepe in Nigerië het in onlangse maande die lewe van honderde mense geëis.
"Die situasie in Nigerië is onvoorspelbaar," lui die verklaring.
Amerikaners is aangeraai om hul "persoonlike sekuriteit" in ag te neem.
Nigerië se polisiehoof het Woensdag beveel dat "24 uur, waterdigte sekuriteit" by alle buitelandse ambassades in die land moet wees.
Daar is aanvanklik geglo dat 'n groep mense, wat kwaad is oor 'n amateurvideo op die internet verantwoordelik is vir die aanvalle in Kaïro en Benghazi. Dié film, wat in Amerika vervaardig is, beledig glo die Islam-geloof, maar amptenare in Amerika het gesê die aanvalle in Benghazi is vermoedelik beplan.
Geweld wat met geloof verband hou, het in onlangse jare die lewe van duisende Nigeriërs geëis. Die Islamistiese groep Boko Haram word blameer vir meer as 1 400 sterftes sedert 2010, terwyl sektariese geweld tussen Moslem- en Christen-gemeenskappe die lewe van duisende ander geëis het.
– Volg Nuus24 op Twitter
- Sapa - AFP
