Amerikaanse ambassade heropen in Tripoli
2011-09-23 11:28
Tripoli – Die Amerikaanse ambassadeur vir Libië het Donderdag sy vertroue in die nuwe Libiese regering uitgespreek tydens die heropening van die Amerikaanse ambassade in Tripoli.
Die ambassade was tydens die onrus wat die afgelope paar maande in die land geheers het, gesluit.
Ambassadeur Gene Cretz het erken dat Libië deur baie uitdagings in die gesig gestaar word terwyl daar nog na Muammar Gaddafi, die ontsetelde Libiese leier, gesoek word.
“Die volgende paar maande is van uiterste belang terwyl die Libiërs die fondamente neerlê vir ‘n pluralistiese demokrasie wat die regte van alle burgers respekteer,” het hy gesê voordat die vlag voor sy tuiste in Tripoli gehys is.
“Amerika en die internasionale gemeenskap is gereed om te help op enige manier wat hulle kan.”
Intussen het die Tunisiese owerhede vir Al-Baghdadi al-Mahmoudi, Libië se voormalige premier, in hegtenis geneem op aanklagte dat hy onwettig en sonder ‘n visa oor die grens na Algerië wou vlug.
Die Nasionale Oorgangsraad het gesê hulle gaan vra dat al-Mahmoudi na Libië terug gestuur word om vervolg te word.
– Volg Nuus24 op Twitter.
- Sapa - AP