Amerika onttrek nog personeel uit Libië

2012-09-28 09:35

New York – Amerika onttrek nog personeel uit sy ambassade in Tripoli, sowat twee weke na verskeie personeellede Libië verlaat het ná ‘n aanval op die Amerikaanse konsultaat in Benghazi.

“Ons onttrek nog personeel uit Libië weens veiligheidsredes redes,” het ‘n staatsamptenaar gesê.

Daar sal glo Vrydag nóg betogings in Benghazi en Tripoli plaasvind.

“Ons sal volgende week die situasie hersien en ons doel is om die personeel so gou as moontlik weer terug te stuur.”

Die meeste Amerikaanse personeel is reeds uit Tripoli onttrek nadat vier Amerikaners, insluitend ambassadeur Chris Stevens, op 11 September in 'n aanval by die Amerikaanse konsultaat in Benghazi dood is.

Alle Amerikaanse personeel in Benghazi is al onttrek.

Amerikaanse amptenare weier om te sê hoeveel personeel nog in Tripoli is.

‘n Boodskap op die ambassade se webtuiste het Amerikaanse burgers in Libië gewaarsku teen die betogings wat Vrydag sal plaasvind.

“Selfs betogings wat vreedsaam voorkom kan vinnig geweldcadig en onvoorspelbaar raak. Vermy dit ten alle koste. Wees waaksaam en oplettend oor wat die plaaslike nuus sê,” het die boodskap gelui.

– Volg Nuus24 op Twitter
 

- AFP