Algerië is kwaad vir Gaddafi se dogter
2011-12-02 11:03
Algiers – Algerië het Donderdag gesê dat Aisha Gaddafi, die dogter van kol. Muammar Gaddafi, se onlangse uitlatings dat vrye Libiërs haar land se nuwe regering moet omverwerp, “onaanvaarbaar” is.
Die Algerynse departement van buitelandse sake het gewaarsku dat sy die gasvryheid van Algerië misbruik het. Sy het, saam met haar ma en twee van haar broers, na Algerië gevlug en is ballingskap gegun op grond van humanitêre redes.
“Dit is betreurenswaardig dat sy hierdie onaanvaarbare uitlatings gemaak het, so ook die feit dat sy, vir die tweede keer, die voorwaardes vir haar ballingskap in Algerië misbruik het,” het Amar Belani, die woordvoerder van Murad Medelci, die minister van buitelandse sake, gesê.
“Die Gaddafi-familie word in Algerië vir ‘n (tydelike) tydperk gehuisves,” het die minister in ‘n verklaring gesê. Hy het ook verder gewaarsku dat enige “nuwe oortredings” gevolge vir haar sal hê.
Aisha het in ‘n boodskap op ‘n Siriese radiostasie gesê dat Libiërs “die bloed van jul martelaar moet wreek. Kom in opstand teen die nuwe regering.”
– Volg Nuus24 op Twitter.
- Sapa - AFP