Algerië: Tientalle sterf in koue front
2012-02-09 18:06
Algiers – ‘n Koue front wat die lewens van tientalle mense in Algerië geëis het, het sterk kritiek in die media ontlok oor wat gesien word as die regering se swak reaksie op die noodsituasie.
AFP se jongste telling wat Woensdag gedoen is, het 29 sterftes aangedui, met sneeustorms, hael en swaar reën wat die noorde en ooste van die land in sy ysige greep het.
Nietemin het Channel Three-radio Donderdag amptelike bronne aangehaal dat 44 mense in die afgelope week dood is.
Dertig mens is glo in motorongelukke dood en 14 aan versmoring as gevolg van swak verhittingtoestelle.
“Waar is julle menere ministers?” het die gewilde Ecchourouk-koerant Donderdag gevra en het hulle daarvan beskuldig dat hulle meer tyd aan die opkomende algemene verkiesings in Mei gee as om hulp te bied aan diegene wat deur die ysige weer geraak word.
“’n Katastrofe en geen noodverligting om dit te hanteer nie,” het die El-Khabar-koerant geskryf.
“Waarvoor wag die regering om ‘n noodsituasie ‘n week ná die begin van die kouefront te verklaar” wat 20 van die land se 48 streke raak, het die koerant gevra.
Koerante het ook ‘n skielike toename in kospryse, sowel as gasbottels wat gebruik word vir verhitting, gekritiseer.
– Volg Nuus24 op Twitter
- AFP