Al-Kaïda, Soedan is hoog op AU-agenda
2010-02-02 09:27
Addis Ababa – Die president van Senegal, Abdoulaye Wade, het Maandag gedurende die Afrika-unie (AU) sametrek in Ethiopië 'n beroep op Afrika-leiers gedoen om saam te staan teen Al-Kaïda se aktiwiteite in Noord-Afrika.
"Hierdie woestynterrorisme neem nuwe en ontstellende vorms aan...maar lande soos Senegal, of Mali, kan niks daaraan doen op hulle eie nie. Dit is 'n internasionale probleem. Westerse owerhede moet ook aandag hieraan gee," het die Wade in 'n onderhoud ná sy toespraak in die Ethiopiese hoofstad gesê.
Die Noord-Afrika tak van Osama bin Laden se terreurnetwerk het onlangs gedreig om 'n Franse gyselaar wat in November in Mali ontvoer is, te vermoor. Die groep hou tans ook vyf ander Europeërs gyselaar in dié streek.
Behalwe vir die kwessie van Al-Kaïda, was spanning en voortdurende konflik in Soedan ook 'n belangrike besprekingspunt op die agenda.
Libië se leier en vorige AU-president Moeammar Ghaddafi het gewaarsku dat Soedan "nog 'n Soemalië" kan word.
Kiesers in Soedan sal in 2011 in 'n referendum stem of die suidelike deel van die land mag afstig en onafhanklikheid verklaar.
Kenners vrees dat so 'n verklaring Soedan, Afrka se grootste land, en veral sy nege buurlande verder sal destablisieer.
VN sektretaris-generaal Ban Ki-Moon, wat die eerste dag van die sametrek bygewoon het, het ook klem gelê op die toekoms van Soedan.
"Die VN het 'n groot verantwoordelikheid, saam met die AU, om vrede in Soedan te handhaaf en die idee van eenheid aantreklik te maak...hierdie jaar sal 'n waterskeidingsjaar vir Soedan wees, met die verkiesing oor sowat drie maande, en die referendum oor 'n jaar," het hy Sondag gesê.
– Sapa-AFP