Agt in Gambië 50 jaar tronk toe vir handel in kokaïen
2011-10-13 08:36
Banjul – Agt buitelanders is Woensdag in ‘n Gambiese hof tot 50 jaar tronkstraf gevonnis vir die handel in kokaïen ter waarde van ‘n miljard dollars.
Die skuldiges is vier Venezolane, twee Nederlanders, ‘n Mexikaan en ‘n Nigeriër, het ‘n AFP-korrespondent gesê. ‘n Ander Venezolaan is dood voordat hy gevonnis kon word.
Hulle is skuldig bevind op nege van die tien aanklagte van dwelmhandel en is verder met ‘n boete van 50 miljoen Gambiese dalasis (sowat R14 miljoen) gevonnis.
“Die Gambiese regering se beleid oor dwelmhandel is geen geheim nie en daarom gaan ek ‘n teken aan ander dwelmhandelaars stuur dat hulle van Gambië af moet wegbly,” het Lamin Tabally, die landdros, tydens die uitspraak gesê.
– Volg Nuus24 op Twitter.
- Sapa - AFP