Afrika-vulkaan ‘woed steeds,’ vertraag vlugte
2011-06-15 11:44
Addis Ababa – Die sekretaris van ‘n internasionale vulkaanmoniteringsgroep, Raul Romero, sê die Nabro-vulkaan in Eritrea is steeds besig om uit te bars.
Daar is aanvanklik geglo dat die vulkaan, wat Maandag begin woed het, die Dubbi-vulkaan was.
Die vulkaanwaghond, IAVWOPSG, wat uit Montreal, Kanada bedryf word, is deel van die Internasionale Burgerlugvaartorganisasie.
Romero het Woensdag bevestig dat Nabro steeds uitbars.
Verder berig RSG sommige vlugte in Oos-Afrika word weens die vulkaniese aswolk ontwrig.
'n Woordvoerder van die Ethiopiese Lugdiens sê vlugte na Soedan se hoofstad, na Djibouti en na die noorde van Ethiopië word ontwrig.
Die vulkaan in Eritrea het Maandag begin uitbars. Eritrea grens aan Soedan, Ethiopië en Djibouti en het 'n bevolking van sowat vyf miljoen mense.
Intussen het die Amerikaanse minister van buitelandse sake, Hillary Clinton, 'n besoek aan drie Afrika-lande weens dié vulkaniese uitbarsting kortgeknip.
Volgens Atalay Ayele van die Addis Ababa-universiteit se Geofisiese Observatorium is die aswolk besig om te krimp, maar is dit steeds besig om in die rigting van Egipte en Soedan te beweeg.
Volg Nuus24 op Twitter