Abidjan heropen hoofgevangenis
2011-08-17 13:39
Abidjan – Die Ivoorkus het Abidjan se hoofgevangenis heropen en beloof om die slegte toestande daar te verbeter sowat vyf maande nadat opstandelinge meer as 5 000 gevangenes uit die tronk vrygelaat het.
Die gevangenis, die Arrest and Correction House (Maca), is gebou om 1 300 mense te huisves, en is berug as 'n tronk waar gevangenes mishandel word en honger ly.
“Maca is van vandag af weer oop,” het Jeannot Ahoussou, die minister van justisie, tydens die openingseremonie gesê.
“Hierdie keer sal ons egter alles in ons vermoë doen om te verhoed dat die tronk oorvol raak soos wat voorheen plaasgevind het.”
Dit behoort in die nabye toekoms nie 'n probleem te wees nie, omdat daar tans net 16 misdadigers in die tronk aangehou word.
Die Ivoorkus het pas ‘n erge burgeroorlog deurgemaak wat begin is toe Laurent Gbagbo, die voormalige president, geweier het om sy amp prys te gee nadat hy die verkiesing teen Alassane Ouattara verloor het.
– Volg Nuus24 op Twitter.
- Reuters