Aanvalle duur steeds voort in Zim
2009-10-04 18:30
Plaasaanvalle, grondvergrype, menseregteskendings en onderdrukking van die politieke opposisie duur voort in Zimbabwe.
Die jongste verslag van die Zimbabwe Inclusive Government Watch het aangedui:
- Grondbesetters het op 31 Augustus die plaashuis van mnr. Ben Freeth, ’n boer van die Chegutu-omgewing, aan die brand gesteek terwyl hy by die kerk was.
Freeth kon nie die brand blus nie omdat die grondbesetters al sy gereedskap, toerusting en waterpype gesteel het.
Hy moes toekyk hoe die plaashuis tot op die grond afbrand.
- Mnr. Mike Campbell en sy vrou, Angela, se plaashuis in dieselfde omgewing as Freeth se plaas, is drie dae later afgebrand.
- Mnr. Arnold Mostert is op 12 Augustus deur vyf Zanu-PF- ondersteuners vermoor toe hy daarop aangedring het dat mnr. Harry Munetsi, plaaslike voorsitter van Zanu-PF in Macheke, hom uitstaande loongeld betaal.
Mostert is vasgebind, met stompe aangerand en sy buik is met warm ysterpale gebrand voordat sy lyk in die pad gegooi is.
- Munetsi, die hoofman van Macheke, het mense op 12 Augustus uit hul huise gesit om plek te maak vir ’n wildplaas en ’n safari-onderneming wat in samewerking met ’n Chinese maatskappy gebou word.
- Mugabe weier tans om – soos ooreengekom met die MDC, wat die land in koalisie met Zanu-PF regeer – ’n nuwe sentrale bankhoof en ouditeur-generaal aan te stel.
- Rapport