Aanval op Christene veragtelik, sê pous
2011-01-03 10:01
Die Burger
Vatikaanstad. – Pous Benedictus XVI het gister die bomaanval op ’n kerk in Egipte waarin 21 mense omgekom het, veroordeel.
“Hierdie veragtelike gebaar, soos die plant van bomme naby die huise van Irakse Christene om hulle te laat vlug, gee God en die hele mensdom aanstoot,” het die pous ná sy weeklikse dankgebed gesê.
’n Motorbom het Saterdag buite ’n Koptiese Christenkerk in Alexandrië ontplof terwyl dosyne mense hier saamgetrek het vir Nuwejaarsvieringe. Volgens die Egiptiese minister van binnelandse sake kon ’n buitelands-gesteunde selfmoordbomaanvaller vir die aanvalle verantwoordelik wees.
Talle Christene het in die strate teen dié gebeurtenis betoog en sommige Christene en Moslems het mekaar met klippe gegooi. Christene maak sowat 10% van die Egiptiese bevolking van 79?miljoen uit.
Die pous het Christengemeenskappe aangemoedig om op ’n nie-gewelddadige wyse deur te druk in die aangesig van wat hy beskryf het as “’n strategie van geweld wat Christene teiken”.
Vroeër is Christene in die Irakse hoofstad, Bagdad, ook geteiken en is twee mense dood en 16 ander beseer in ’n bomaanval verlede Donderdag.
Op Kersfees het ses mense gesterf in aanvalle op Christenkerke in die noordooste van Nigerië en ses is gewond in ’n bomaanval op ’n Katolieke kerk op die eiland Jolo in die Filippyne.
Die Vatikaan vrees dat die aanvalle, tesame met verskeie beperkings op Christene in lande soos Saoedi-Arabië, ’n uittog deur Christene uit die streek kan aandryf.
In sy Nuwejaarspreek het die pous gesê “woorde is nie genoeg” om vrede in veral die Midde-Ooste te bewerkstellig nie.
Hy het vir “konkrete en deurlopende toewyding” van nasionale leiers gevra en dat almal op ’n plaaslike vlak vrede moet nastreef in hul verhouding met hul bure.
Volg Nuus24 op Twitter.
- Reuters