Aanval by VN se basis in Mogadisjoe
2012-01-11 14:21
Mogadisjoe – Ongeïdentifiseerde mans het die hoofkompleks van die Verenigde Nasies in Mogadisjoe, die hoofstad van Somalië, aangeval.
Die mans het glo twee handgranate gegooi wat naby die muur ontplof het, het VN-amptenare en getuies Woensdag gesê.
Volgens getuies het die twee handgranate Dinsdag op die pad langs die muur van die VN se gebou geland.
Sekuriteitswagte by die kompleks het begin skiet, maar geen sterftes is aangemeld nie.
“Daar was ‘n handgranaat-aanval by die kompleks gisteraand (Dinsdagaand). Die ontploffings was naby die muur en daar is geen sterftes nie, aangesien dit nie die kompleks bereik het nie,” het ‘n plaaslike VN-amptenaar op die voorwaarde van anonimiteit gesê.
Mohamed Jama, ‘n man wat langs die VN se kompleks bly, het gesien hoe twee mans weghardloop ná die ontploffings toe die VN se sekuriteitswagte begin skiet het.
“Ek het gesien hoe twee mans in die straat agter my huis hardloop nadat hulle die handgranate gegooi het. Die VN-sekuriteitswagte op die uitkyktorings het begin skiet, maar niemand is glo beseer nie,” het Jama gesê.
Geen groep het tot dusver verantwoordelikheid vir die aanval aanvaar nie.
Dit was die jongste in ‘n rits onlangse ontploffings wat die stad in onlangse maande geruk het.
– Volg Nuus24 op Twitter
- AFP