Aansteeklike virus versprei in Uganda
2012-10-25 15:40
Kampala – Die aantal mense wat dood is sedert die uitbreking van die Marburg-virus in die suidweste van Uganda, staan nou op ses, het die land se ministerie van gesondheid Donderdag gesê.
Die hoogs aansteeklike virus het na drie distrikte – insluitend die hoofstad, Kampala – versprei nadat dit vroeg in Oktober in die suidwestelike Kabale-distrik uitgebreek het.
Sowat 200 mense wat vermoedelik in kontak was met Marburg-slagoffers, word gemonitor, het Christine Ondoa, minister van gesondheid, aan joernaliste gesê.
Sy het gesê 10% van die mense wat gemonitor word, is in Kampala.
Simptome van die Marburg-virus sluit in koors, braking, gewrigpyne, hoofpyn en interne bloeding. Beide Marburg en Ebola word versrei deur direkte kontak met wonde, speeksel, uriene of die sweet van 'n persoon of wilde dier wat met die virus besmet is.
– Volg Nuus24 op Twitter
- Sapa-DPA
