6 tronkbewaarders per gevangene in Suid-Soedan
2011-09-22 08:22
Pretoria – Die weermag kan nie nóg vredesoldate Suid-Soedan toe stuur nie en oorweeg dit nou om eerder ’n bemande veldhospitaal tot die VN-sending by te dra.
Selfs dié hospitaal sal die weermag se militêre gesondheidsdiens (SAMGD) se vermoëns toets nadat dié diens nog nie in een van die buitelandse vredesontplooiings waar die weermag betrokke was, ’n hospitaal van die grond af kon kry nie.
Die splinternuwe VN-mag in die Suid-Soedan, Unmiss, gaan uiteindelik uit ses bataljons (nagenoeg 6 000) soldate bestaan.
’n Voorligtingsessie oor die situasie in dié land is Woensdag in Pretoria aangebied vir weermagstudente wat besig is met hul stafopleiding.
Volgens oudkol. Wally Vrey, wat by Unmiss se afdeling vir geregtigheid en veiligheid in Juba, hoofstad van die Suid-Soedan, betrokke is, het vier lande hulle reeds daartoe verbind om soldate te stuur. Kenia, Rwanda en Mongolië sal elk 1000 soldate bydra en Indië 2000.
Daar is gehoop dat Suid-Afrika die oorblywende bataljon sal bydra, maar dis buite die kwessie weens bestaande verpligtinge in Darfoer, die Demokratiese Republiek van die Kongo (DRK) en elders.
Volgens Helmoed-Römer Heitman, ’n militêre kenner, is die veldhospitaal moontlik aangebied omdat dit die Suid-Afrikaanse regering in swak lig kan stel as hy niks tot die vredesproses in die Suid-Soedan bydra nie.
Volgens ingeligtes is die SAMGD egter in ’n reuse-verknorsing wat personeel betref.
Met die ontplooiing van soldate in die DRK het die VSA selfs ’n spesiale struktuur wat geskik sou wees vir ’n veldhospitaal aan die weermag geskenk.
Toe die hospitaal steeds nie ’n werklikheid geword het nie, het die Indiese weermag een opgerig.
Die beoogde hospitaal sal beteken dat minstens 200 tot 300 SAMGD-personeellede in die Suid-Soedan moet gaan werk. Daarbenewens sal ’n beskermingskomponent daar ontplooi moet word.
Na verneem word sal die hospitaal slegs trauma-verwante gevalle hanteer omdat daar nie genoeg dokters in die SAMGD is vir ander dienste nie.
Vrey het gesê die Suid-Soedan het tans géén ekonomie, inkomste of behoorlike regeringstrukture om hom op sy voete te help nie. Hy gaan vir die volgende paar jaar waarskynlik van die buiteland afhanklik wees om sy eie vermoëns op te bou. Sonder beleggings en werkskepping gaan dit boonop moeilik wees om mense wat hul lewe lank aan oorlog gewoond is, te oortuig dat hulle gedemilitariseer moet word.
“Al wat daar in oorvloed is, is gewapende magte, al is daar nie eens ’n behoorlike polisiemag nie.
“Daar is selfs ses tronkbewaarders vir elke gevangene,” het Vrey gesê.
– Volg Nuus24 op Twitter.
- Die Burger