572 weermag-gevangenes in Egipte vrygelaat
2012-07-20 10:01
Kaïro – Mohamed Morsi, president van Egipte, het die vrylating van 572 mense aangekondig wat deur die weermag aangehou word.
Morsi, wat verlede maand as Egipte se eerste demokratiese president verkies is, het ‘n bevel uitgereik om 572 mense, wat deur die weermag aangehou word, vry te laat, het die nuusagentskap MENA berig.
Die president het ook beveel dat ‘n nuut aangestelde komitee die verhore van die mense sal hersien.
Altesaam 11 879 mense is sedert verlede jaar se opstande teen die voormalige president Hosni Mubarak deur die weermag aangehou .
Altesaam 9 714 van dié mense is reeds vrygelaat.
Aktiviste en internasionale menseregtegroepe het herhaaldelik gevra vir die einde van militêre verhore vir die publiek.
“Die internasionale wet is baie duidelik oor hierdie saak: geen burgerlike, ongeag van die misdaad, moet deur die weermag verhoor word nie,” het Sarah Leah Whitson, Human Rights Watch se direkteur vir die Midde-Ooste en Noord-Afrika, gesê.
Sy het Morsi aangemoedig om al die burgerlikes wat deur die weermag verhoor is, vry te laat.
“Militêre verhore en inhegtenisnemings duur voort ten spyte van president Morsi se verkiesing op 30 Junie,” het Human Rights Watch gesê.
Militêre verhore is al voorheen gekritiseer omdat dit nie aan die vereistes voldoen van onafhanklikheid en onpartydigheid nie.
– Volg Nuus24 op Twitter
- Sapa - AFP
