4200 wat van plase moes af kort hulp
2009-11-09 01:33
André le Roux
Harare - Meer as 4 200 wit Zimbabwiese boere en hul gesinne wat van hul plase afgeskop en na dorpe en stede gedwing is, is nou hulpbehoewend.
Die Zimbabwiese landbou-unie het gister ’n geldinsamelingsveldtog van stapel gestuur om in dié mense se basiese lewensbehoeftes te voorsien.
Die oorblywende wit boere in Zimbabwe verloor vinnig moed in hul stryd teen die verskerpte besettings en afsettings van hul plase, het die landbou-unie gesê.
Op ’n mediakonferensie in Harare gister het Deon Theron, voorsitter van die unie, ook gewaarsku Zimbabwe gaan nóg ’n plantseisoen verbeur deur die gebrek aan produksie-aktiwiteit op plase wat wit boere ontruim het.
“Ons staan en kyk hoe ’n katastrofe voor ons opdoem.”
Theron het daarop gewys dat wit boere slegs 10% van plase in die land nog bewerk, terwyl 90% van die land se landbougrond nou in die hande van nuwe eienaars is wat lande braak laat lê weens ’n gebrek aan ervaring, toerusting, geld en kundigheid.
Die gevolg is dat Zimbabwe weer vanjaar op ’n algehele misoes afstuur en nie die vermoë sal hê om homself te voed nie.
Meer as 5,1miljoen Zimbabwiërs was weens verlede jaar se gebrekkige kosproduksie by tye daagliks van internasionale kosskenkings afhanklik.
Dis meer as die helfte van die land se bevolking.
Meer as 4200 wit landbou-unielede is ook nou sonder ’n standhoudende inkomste.
Die unie probeer nou geld insamel om hulle te help om te oorleef.
“Ons het $1,2miljoen (sowat R9 miljoen) per maand nodig om na die basiese behoeftes van hierdie mense om te sien,” het Theron gesê.
Volgens die landbou-unie duur die “aanslag” teen boere onverpoos voort. Meer as 150 wit boere word tans in Zimbabwiese howe vervolg omdat hulle nog op hul plase is.
Net 400 boer nog aktief. Meer as 5000 is sedert die plaasbesettings in 2000 begin het hul plase kwyt, baie met geweld.
Meer as 250000 plaaswerkers het hul werk met die afsetting van die boere verloor. Net 18000 van hulle woon en werk nog op van die plase.
Theron het aan Beeld gesê hy ervaar ’n toeloop van boere wat “nie meer kan nie en gaan opgee”.
“Ons kry pak van alle kante. Ons weet nie hoeveel langer die oorblywende boere dit nog sal kan uithou nie.
“Ons is ’n land in warboel. Ons is onseker wat die toekoms inhou en om sake te vererger, staar ’n ongekende kosskaarste ons in die gesig terwyl ons boere vervolg en verbied word om te boer,” het hy gesê.
- Beeld