300 Somaliërs vas ná klopjag
2010-01-18 12:13
Nairobi – Die Keniaanse polisie het sowat 300 onwettige Somaliese immigrante gedurende ’n klopjag in Nairobi in hegtenis geneem.
Dit kom nadat gewelddadige betogings by 'n groot moskee in Nairobi plaasgevind het, het ‘n senior amptenaar Maandag aan AFP gesê.
Die klopjag wat in die stad se woonbuurt Eastleigh uitgevoer is, is deur die eenheid vir algemene dienste en die anti-terreur-polisie uitgevoer.
Die klopjag kom nadat gerugte die ronde gedoen het oor Islamitiese militante, die Shebab-groep wat die land vanuit Somalië infiltreer.
"Die wat in hegtenis geneem is, was onwettig in die land en hulle het geen geldige dokumente by hulle gehad nie,” het die senior amptenaar gesê.
"Hulle word by verskeie polisiestasies aangehou soos die ondersoek oor hulle teenwoordigheid in Kenia voortduur.”
Honderde Moslem-jeugdiges het Vrydag na die biduur in en rondom die moskee betoog oor die vrylating van ‘n kontroversiële Jamaikaanse imam en met die polisie gebots.
Vyf mense het gesterf en talle ander is gedurende die betoging beseer.
Abdullah al-Faisal, ’n Jamaikaanse Moslem-geestelike wat op die internasionale terreurlys is, was vir langer as ‘n week onder Keniaanse toesig nadat owerhede daarin misluk het om hom te deporteer. Al-Faisal (45) is verlede week in hegtenis geneem omdat hy die immigrasiereëls oor prediking oortree het.
George Saitoti, die minister van binnelandse sake beweer dat Shebab-beweging by die betoging betrokke was.
- Sapa-AFP