17 lyke in Gaddafi-woning gevind
2011-08-25 14:37
Tripoli – ‘n Hospitaal in Tripoli het 17 lyke ontvang van burgers wat glo onlangs deur regeringsmagte in Muammar Gaddafi se kamp in die hoofstad tereggestel is, het ‘n Britse mediese werker Donderdag gesê.
“Daar het Woensdag ‘n trok by die hospitaal opgedaag met 17 lyke in,” het Kirtsy Campbell van die Internasionale Mediese Korporasie gesê.
“Die mense is sowat tien dae gelede in hegtenis geneem. Hulle lyke is in die Bab al-Aziziya-kamp gevind toe die rebelle dit oorgeneem het. Hulle is daar geskiet,” het sy gesê.
Hulle wonde is nie oorlogbeserings nie, het sy bygevoeg.
Campbell het gesê daar is gerugte van nog lyke, maar dat sy Woensdagaand net 17 getel het.
Familie het glo reeds die lyke identifiseer.
Intussen is meer as 30 mans, vermoedelik ondersteuners van Gaddafi, by 'n militêre kamp in Tripoli dood gevind.
Twee van die lyke was met plastiek boeie vasgebind wat aandui dat hulle tereggestel is.
'n Joernalis van Reuters, wat op die toneel was, het gesê hy het 30 liggame getel wat vol gate geskiet is.
– Volg Nuus24 op Twitter.
- Reuters