1500 gevangenes vrygelaat
2009-09-02 18:19
Harare- Zimbabwe se koalisie- regering sal binnekort sowat 1500 gevangenes vrylaat in die hoop om die druk in die oorvol tronke te verminder.
Dit kom nadat ‘n dokumentêre film gewys het hoe halfkaal, uitgehongerde gevangenes in die tronke sterf. Daar word ook oor die algemeen na die tronke in Zimbabwe as die “doodskampe” verwys.
Volgens David Mangota, Zimbabwe se sekretaris belas met regspleging en parlementêre sake, sal sowat 1544 gevangenes amnestie vanaf president Robert Mugabe ontvang.
Die amnestie is van toepassing op veral vroue en gevangenes wat minder as drie jaar tronkstraf moet uitdien. Dit sluit gevangenes uit wat van ernstige misdade aangekla is.
Volgens Mangota is die amnestie deel van ‘n korttermynplan om die ergste druk in die tronke te verminder.
Irene Khan van Amnestie Internasionaal, het na afloop van haar besoek aan die tronke in Junie vanjaar gesê dat dit nie geskik is vir mense om in te lewe nie. Sy het ook bekendgemaak dat sowat 1000 gevangenes in die eerste ses maande van 2009 gesterf het.
Maar die skielike vrylating van soveel kriminele het inwoners van Zimbabwe bekommerd dat ‘n golf van misdaad kort daarna sal volg.
–Sapa