150 Tunisiese emigrante vermis ná boot sink
2011-04-06 13:48
Rome - ‘n Soektog na 150 Tunisiese emigrante is onderweg nadat hulle in die Middellandse See vermis geraak het ná hulle boot omgekeer het, het BBC Woensdag berig.
Italiaanse reddingspanne het reeds 48 vlugtelinge van die boot gered, wat 200 mense vervoer het.
Die boot is sowat 70 km van Lampedusa gevind. Die eiland sukkel al ‘n geruime tyd lank met duisende Tunisiese emigrante wat van die begin van die jaar af soontoe reis.
Beamptes van die reddingspan het glo 15 lyke op die toneel gesien, berig AFP.
Italië en Tunisië het ‘n ooreenkoms aangegaan om die instroming van Tunisiërs na Italië stop te sit.
Rome het ingestem om kort termyn verblyfpermitte aan 20 000 onwettige emigrante te gee maar beplan om alle nuwe aankomelinge te deporteer.
Roberto Maroni, die Italiaanse minister van binnelandse sake, het gesê die reëling sal hulle toelaat “om die kraan toe te draai” op onwettige immigrasie.
Volgens die reëling kan Italië aan Tunisiese sekuriteitsmagte “die nodige hulp” verskaf om die groeiende ringsmokkelary-bedryf te stop. Duisende mense word gereeld in klein vissersbote gedruk wat oornag oorvaar na Lampedusa, ‘n klein Italiaanse eiland naby Tunisië se kus.
Meeste van die Tunisiërs wat na Italië reis is oortuig daarvan dat dit hulle ‘n beter lewe sal gee. Meeste van hulle beplan om na Frankryk of ander Europese lande te gaan vir werke en familie en beplan nie om in Italië aan te bly nie.
- Volg Nuus24 op Twitter.
- Sapa - AP