13 rebelle in DRK gedood
2009-09-21 23:50
Kinshasa – Die Demokratiese Republiek van die Kongo (DRK) se weermag het 13 Rwandese Hutu-rebelle doodgemaak en beheer geneem van drie van hulle basisse in die ooste van dié land.
Die weermag het Sondag ná intensiewe gevegte beheer geneem van die dorpe van Makola, Magembe en Kihungwe, het kol. Delphin Kahimbi, gesê.
Volgens Kahimbi is 13 rebelle dood, drie beseer en nege ander gevange geneem. Die weermag het ook op sowat 18 wapens beslag gelê.
Drie soldate van die DRK-weermag is tydens die gevegte beseer.
Joseph Ilunga, die kommandeur van dié drie FDLR-basisse is ook tydens die gevegte dood.
Dié dorpe was basisse vir die lede van die Rwandese rebellemag (FDLR) in die DRK. Die weermag het in Julie vanjaar grootskaalse aanvalle teen die FDLR geloods.
"Die uiteinde van die week se gevegte was baie positief”, het Kahimbi gesê.
Die FDLR het na bewering sowat 5000 tot 6000 lede en sommige van hulle was betrokke by die 1994 volksmoorde waartydens Hutu-vegters sowat 800 000 Tutsi’s en sogenaamde hensoppers (Hutu’s) in die DRK se buurland Rwanda geslag het.
- Sapa