11 kinders vas ná aanval in Nigerië
2010-01-12 12:40
Kanu, Nigerië - Elf kinders tussen die ouderdomme van vyf en 13 jaar word by ‘n tronk vir jeugdiges in die noorde van Nigerië aangehou in verband met aanvalle in Desember deur 'n sekte.
Die jeugdiges sal in die hof verskyn in verband met die dood van 70 mense tydens verlede maand se aanvalle, het polisie gesê.
“Wat ons betref is hulle (die kinders) verdagtes en sal hulle in die hof verskyn sodra die huidige staking deur regslui tot ‘n einde kom,” het Atiku Kafur, die polisiekommissaris van Bauchi, aan die AFP gesê.
Die Rooikruis in Nigerië het egter gesê die kinders is deel van 'n groep mense wie se huise gedurende geweld aan die einde van verlede jaar verwoes is.
Geweld het einde Desember tussen lede van 'n Islamitiese sekte, bekend as Kala-Kato, en sekuriteitsmagte uitgebreek. Sewentig mense, waaronder talle kinders en minderjariges, het gesterf.
Die Kala-Kato sekte verwerp alle moderniteit, insluitend enige Westerse vorm van onderwys en medisyne.
Dié sekte verban ook televisie en radio in enige van sy lede se huise en verwerp alle literatuur behalwe die Koran.
“Sedert 29 Desember is daar 65 ontwortelde persone by ons - 48 kinders wie se ouers in die aanvalle dood is en hul 17 ma's," het Adamu Abubakar, hoof van die Rooikruis in Nigerië, aan AFP gesê.
- Sapa-AFP