Facebook-Vigs-verklikker vry
2011-01-12 11:44
Windhoek - 'n Namibiese man wat na bewering die MIV-status van ten minste ses mense van die Rundu-omgewing in Namibië verlede jaar op Facebook uitgelap het, is vir eers vry na die saak teen hom teruggetrek is.
McKenzie Kheib (28), wat as Buruku op Facebook bekend gestaan het, het glo verlede jaar ’n lys van name van ses mense wat MIV-positief is en antiretrovirale behandeling ontvang, op sy profiel geplaas het.
Die seksuele oriëntasie van sekere sakelui is na bewering ook onder die skakel, genaamd ‘Rundu re-loaded,’ bekend gemaak.
Kheib, ’n platejoggie by verskeie nagklubs en kroeë, is verlede week op sy tuisdorp Grootfontein in hegtenis geneem. Die profiel is intussen van die sosiale netwerk verwyder.
Volgens die adjunk-aanklaer-generaal van die Kavangostreek, Henock Haindobo, is die saak slegs tydelik teruggetrek om die ondersoek na Kheib se beweerde onwettige gedrag af te handel.
Lees die volledige storie hier.
Volg Nuus24 op Twitter.
- Republikein