Tshabalala ryg doele in vir Bafana
2010-03-23 09:45
In-diepte Verslae
Die regering het R10,2 miljoen opgedok vir ’n luukse suite om Afrika-staatshoofde en ander hooggeplaastes tydens die Wêreldbeker-sokkertoernooi te onthaal.
Meer Suid-Afrikaanse kunstenaars gaan by Fifa se Wêreldbeker-konsert by die Orlando-stadion optree, het vervaardigers gesê.
Timothy Molobi
Rio de Janeiro - As Bafana Bafana se maandelange doeldroogte in die Wêreldbekertoernooi voortduur, sal dit nie sommer Siphiwe Tshabalala se skuld wees nie.
Dié Kaizer Chiefs-buksie is, met vier doele in ses wedstryde, die dodelikste aanvaller tot dusver op die Suid-Afrikaanse oefenkamp in Brasilië.
Tshabalala was instrumenteel in die besoekers se vier seges en het sy span Saterdag gehelp om in hul “wraakwedstryd” teen Botafogo te seëvier.
Suid-Afrika het dié kragmeting teen die klubspan van sy voormalige afrigter, Joel Santana, danksy ’n Tshabalala-doel met 1-0 gewen.
Die besoekers, met Tshabalala aan die spits, het nou reeds 14 doele in hul oefenwedstryde behaal, sonder om ’n enkele een af te staan.
Dít nadat hulle in 11 wedstryde sedert die Konfederasiebeker in Junie verlede jaar, net 12 keer op teiken was – met 11 daarvan wat boonop teen die sokker-misoeste Swaziland, Madagaskar, Zimbabwe en Namibië was.
Tshabalala, wat juis ná Bafana se gelykopuitslag teen Namibië in die spervuur was, het Maandag sy nuutgevonde venyn aan sy fiksheid toegeskryf.
“As jy fiks is, is jou selfvertroue meer en hoewel ek tevrede is met my eie spel, is ek veel meer verheug oor die span se spelpeil,” het hy gesê.
“Ons verdedig is veral goed, maar ons benodig nog heelwat skaafwerk in ons teenstanders se doelgebied.”
Afrigter, Carlos Alberto Parreira, is dit met Tshabalala eens.
Hy het Maandag opnuut gekap na die Suid-Afrikaanse sokkervereniging (Safa) en die Premier-sokkerliga (PSL) se gebrek aan “ontwikkelingstrukture” op plaaslike vlak.
“Ons moet oor die weg kom met dít wat ons het, maar wanneer die spel in die land nie op standaard is nie kan ’n mens dit duidelik in die nasionale span sien.”
Dié span het Maandag na Sao Paolo vertrek, waar hy Donderdag teen Desportivo Brasil speel.
- Sport24