Stelsel by Fifa-kaartjiekantore pak op
2010-04-15 13:07
In-diepte Verslae
Die regering het R10,2 miljoen opgedok vir ’n luukse suite om Afrika-staatshoofde en ander hooggeplaastes tydens die Wêreldbeker-sokkertoernooi te onthaal.
Meer Suid-Afrikaanse kunstenaars gaan by Fifa se Wêreldbeker-konsert by die Orlando-stadion optree, het vervaardigers gesê.
Kaapstad - Sowat 11 Fifa-kaartjiekantore en verskeie FNB-takke het Donderdag omstreeks 09:00 hulle deure oopgemaak vir die vyfde en finale verkoopsfase van die 2010 Wêreldbekertoernooi.
Duisende geesdriftiges, waarvan talle sedert Woensdag al in lang toue staan en wag om kaartjies vir die Wêreldbeker-sokkertoernooi aan te skaf, het egter ongeduldig begin raak toe die stelsel “tegniese probleme” ondervind het.
’n FNB-bankbestuurder het bevestig die probleem word tans landwyd ervaar.
Verkope by die FNB-tak in Sandton het tydelik tot stilstand gekom toe die skare oproerig geraak het en die bank weens sekuriteitsredes sy deure moes toemaak.
Geesdriftiges het met sekuriteitsbeamptes, wat by die deure wag gehou het, gebots, en hulle daarvan beskuldig dat hulle mense ingelaat het wat nie deur al die nodige stappe gegaan het nie.
Mense was veronderstel om eers in een ry te staan en 'n nommer te ontvang voordat hulle toegelaat is om in die amptelike ry te kan staan om hul kaartjies te koop, het Eye Witness News berig.
Ongeag dié probleem, was daar baie mense wat nie meer kon wag om hulle kaartjies vir die sokkertoernooi te ontvang nie.
"Ons het geweet die rye gaan lank wees, so ons het baie vroeg gekom,” het Jevon Kannemeyer gesê, wat al sedert 18:45 by die kaartjieskantoor in Kaapstad wag.
Intussen staan sowat 1 000 mense in lang toue by die Spearhead-gebou in Kaapstad en wag – dit nogal in trietsige weersomstandighede.
’n Totaal van tien kaartjies per persoon word tans toegelaat.
- Sport24