‘Sokker wys hóé vir beleggers’
2010-06-28 09:54
In-diepte Verslae
Die regering het R10,2 miljoen opgedok vir ’n luukse suite om Afrika-staatshoofde en ander hooggeplaastes tydens die Wêreldbeker-sokkertoernooi te onthaal.
Meer Suid-Afrikaanse kunstenaars gaan by Fifa se Wêreldbeker-konsert by die Orlando-stadion optree, het vervaardigers gesê.
Die Burger
Kaapstad - Met sokker tans op almal se lippe het ’n voormalige Amerikaanse president, Bill Clinton, Sondag die regte snare geroer toe hy sokker gebruik het as ’n voorbeeld van hoe beleggings in Afrika aangepak moet word.
Clinton was die gasspreker by Fortune, Time en CNN se elfde Global Forum wat vanjaar in die Kaapstadse Internasionale Konferensiesentrum (Kiks) gehou word. Die tema van die konferensie is “Nuwe globale geleenthede”.
Terwyl Afrika tans gasheer is vir die Wêreldbeker-sokkertoernooi, het Clinton ’n beroep op beleggers in Afrika gedoen om te sorg dat Afrikane uiteindelik die vrugte van investering pluk.
“Hoekom dink julle hou soveel mense van sokker? Daar is tog net een wenner,” het Clinton gesê.
Hy was Saterdagaand ’n toeskouer by die kragmeting tussen Ghana en Amerika in die Royal Bafokeng-stadion in Rustenburg.
Clinton het gesê al kan geen sokkerspan heeltyd wen nie, voel mense deel daarvan omdat daar altyd die moontlikheid van wen is.
“Die mens se gees sterf as hy voel daar is nie meer moontlikhede nie. Te veel mense glo nog hulle trek aan die kortste end van die moderne wêreld. Ons moet dié mense laat voel hulle het ’n plek in die wêreld. Enige geleentheid vir Afrika moet dus deur dié lens gesien word.”
Pres. Jacob Zuma het ook tydens sy openingstoespraak via satelliet gesê die Wêreldbeker het gehelp om wanpersepsies oor Afrika uit die weg te ruim, wat belegging op lang termyn sal bevorder.
Ook Mo Ibrahim van die Mo Ibrahim-stigting het tydens ’n ander sessie by die Forum gesê belegging in Afrika sal meer deursigtig moet wees.
Ibrahim het gereageer op ’n vraag of die China-model ’n voorbeeld is oor hoe daar in Afrika belê moet word. Hy het Chinese belegging in Afrika verwelkom, maar gepleit vir meer brûe wat Chinese beleggers met plaaslike gemeenskappe moet vorm.
“Daar moet meer deursigtigheid wees oor beleggingsprosesse en wie wat kry.”
Wolf Blitzer, ’n CNN-aanbieder, het Clinton Sondagaand ná sy toespraak gevra wat na sy mening die grootste globale uitdagings is.
“Op kort termyn moet die ekonomie reggeruk word sodat gewone mense daarby baat kan vind. Op lang termyn moet ons energie op ’n volhoubare manier gebruik,” het Clinton geantwoord.
Hy het ook na globale veiligheid verwys – spesifiek Amerika se betrokkenheid in Afganistan.
Blitzer het hom gepols oor hoe lank Amerikaanse troepe nog in Afganistan gaan wees.
Clinton was versigtig en het gesê hy weet self nie, maar tog ’n mening gewaag. “Ons sal bereid moet wees om minstens vir die volgende drie tot vier jaar daar te bly en vertroue in die Afgaanse regering te herstel voor ons daaraan kan dink om te onttrek.”
- Die Burger