Rooney-enkel het Engeland op sy knieë
2010-04-01 08:24
In-diepte Verslae
Die regering het R10,2 miljoen opgedok vir ’n luukse suite om Afrika-staatshoofde en ander hooggeplaastes tydens die Wêreldbeker-sokkertoernooi te onthaal.
Meer Suid-Afrikaanse kunstenaars gaan by Fifa se Wêreldbeker-konsert by die Orlando-stadion optree, het vervaardigers gesê.
Eduan Roos
Johannesburg - Engeland se Wêreldbeker-hoop hang aan ’n dun draadjie nadat sy sterspeler, Wayne Rooney, Dinsdagaand beseer is.
Dié 24-jarige doelevraat het Woensdag na Engeland teruggekeer nadat hy ’n ernstige enkelbesering opgedoen het in Manchester United se Europese Kampioeneliga-nederlaag teen Bayern München in Duitsland.
Rooney het sy 34ste doel van die seisoen (en United se enigste) vroeg in dié wedstryd aangeteken, maar is kort voor die eindfluitjie beseer.
Volgens Alex Ferguson, United-breier, gaan Rooney in die volgende paar dae skanderings ondergaan om die erns van die besering te bepaal.
Ferguson het toegegee dat die aanvanklike terugvoer “nie belowend is nie” en dat Rooney straks die Red Devils se bepalende kragmeting in die Engelse Premierliga, oormôre teen Chelsea op Old Trafford, sal misloop.
Rooney is die giftigste pyl in Engeland se WB 2010-koker en die Britse media het dit reeds as “moontlik die einde van Engeland se Wêreldbeker-droom” bestempel.
Dié terugslag is die jongste op ’n ellelange lys probleme vir die Engelse se breier, Fabio Capello, met die toernooi wat oor sowat 70 dae begin.
Capello sal reeds sonder die dienste van Michael Owen en David Beckham moet klaarkom, terwyl daar steeds ’n vraagteken hang oor die beskikbaarheid van vyf ander eerstekeuse-spelers.
Die verdediger Ashley Cole sukkel met ’n enkelbesering, terwyl die onlangse John Terry-sage na verwagting ook die internasionale loopbaan van sy gewese Chelsea-spanmaat en Cole se logiese plaasvervanger, Wayne Bridge, beëindig het.
Capello se nuwe kaptein, Rio Ferdinand, het boonop las van ’n seer rug, terwyl die aanvallende middelveldspeler Aaron Lennon en die veteraan-doelwagter David James ook nog op die krukkelys is.
- Sport24