Prostitusie neem toe in Kaap voor WB
2010-05-25 09:00
In-diepte Verslae
Die regering het R10,2 miljoen opgedok vir ’n luukse suite om Afrika-staatshoofde en ander hooggeplaastes tydens die Wêreldbeker-sokkertoernooi te onthaal.
Meer Suid-Afrikaanse kunstenaars gaan by Fifa se Wêreldbeker-konsert by die Orlando-stadion optree, het vervaardigers gesê.
Stellenbosch
Mensehandel – ’n misdryf wat sy slagoffers stom maak en hulle dikwels deur misleiding in ’n strik laat beland – het reeds vóór die Wêreldbeker-sokkertoernooi in die Boland toegeneem.
Volgens Carin Nel van die organisasie Stop Trafficking of People (Stop) kan definitiewe statistieke van slagoffers in die Boland nie gegee word nie.
Daar is egter verhale soos dié van ’n 12-jarige meisie van Grabouw wie se ma haar vir R6 000 aan ’n Nigeriër verkoop het. Hy was op die punt om haar te verkrag toe die Kaapstadse metropolisie haar in ’n pakhuis gevind het.
“Die jong mense wat gelukkig genoeg is om gered te word, wil nie praat nie, of ouers meld nie die gevalle aan nie.
“Die koppelaars en handelaars is geweldig wreed en sal nie skroom om die ‘praters’ dood te maak nie,” het Nel gesê.
Tog kan ’n toename van dié misdryf in die Wes-Kaap gesien word in die sowat 200 nuwe onwettige bordele wat onlangs in die sakesentrum in Kaapstad oopgemaak het. Dit is volgens die Kaapstadse metropolisie, met wie Stop ’n goeie verhouding het, het Nel gesê.
Meer prostitute snags op straat is ook ’n aanduiding dat mensehandel aan die toeneem is. “Die aantal nuwe gesigte onder prostitute dui daarop dat daar baie meer prostitute ingekom het Kaapstad toe voor die Wêreldbeker-sokker,” het Nel bygevoeg.
“In Table View het ’n metropolisietaakspan ’n paar ‘gastehuise’ – wat eintlik maar bordele is – toegemaak. Selfs in die noordelike voorstede is pakhuise deurgesoek en jong meisies gevind wat vertel het dat hulle teen hul wil daar aangehou is. Hulle is glo gedwing om prostitusie te bedryf,” het Nel gesê.
Stop ontvang gereelde e-pos oor voorvalle in winkelsentrums waar mans kinders nader, onder meer twee gevalle in ’n Helderbergse winkelsentrum.
Handelaars lok ook hul slagoffers met misleidende advertensies. Veral skoolmeisies word só in mensehandel verstrengel, meen Nel. “Advertensies in koerante adverteer aanloklike werkgeleenthede met baie goeie salarisse. As die meisies by die werkplek aankom, sien hulle dat dit glad nie was waarvoor hulle aansoek gedoen het nie.”
– Die Burger