Parreira: G’n Bafana-babelas ná 100-dag-vieringe
2010-03-02 13:57
In-diepte Verslae
Die regering het R10,2 miljoen opgedok vir ’n luukse suite om Afrika-staatshoofde en ander hooggeplaastes tydens die Wêreldbeker-sokkertoernooi te onthaal.
Meer Suid-Afrikaanse kunstenaars gaan by Fifa se Wêreldbeker-konsert by die Orlando-stadion optree, het vervaardigers gesê.
Eduan Roos
Johannesburg - Daar sal geen sprake wees van ’n Bafana-babelas nie wanneer sy span se voorbereiding vir die Wêreldbeker-toernooi vandag in alle erns begin, het die sokkerafrigter van die Suid-Afrikaanse span, Carlos Alberto Parreira, belowe.
Terwyl die res van die land 100 dae voor die afskop van WB 2010 vier, sal die Suid-Afrikaners deur hul laaste passies gesit word voor vandag se wedstryd teen Namibië in die Moses Mabhida-stadion in Durban.
Huldeblyke het gister van oor die wêreld heen ingestroom, terwyl Sepp Blatter, Fifa-grootbaas, en verskeie van dié beheerliggaam se reëlingskomitee-lede ook vandag in Durban aankom.
“Dis ’n groot gebaar en ons is dankbaar om deel te kan wees daarvan, want dit wys hoe naby ons is aan die begin van die toernooi,” het Parreira gesê.
“Veel belangriker is die wedstryd teen Namibië egter ’n laaste kans om ’n paar spelers te sien wat lanklaas die Bafana-trui gedra het.
“Ek besef Namibië is nie juis Brasilië nie, maar ons Wêreldbeker-voorbereiding begin nou en ons durf hulle nie onderskat nie.
”Dié gewese Wêreldbeker-wenner sal veral die vertonings van die verdedigers Bryce Moon en Bradley Cranell met valkoë dophou.
“Ek het reeds ’n redelike idee van my uiteindelike groep, maar daar is nog ’n paar beskikbare plekke,” volgens Parreira.
“Ons kort veral diepte onder die verdedigers en Carnell is ’n ervare speler, terwyl ek graag sal wil sien wat Moon kan bied.
”Met Morgan Gould wat hom weens ’n besering aan die groep moes onttrek, kan Bongani Khumalo, ’n spanmaat van Gould by SuperSport United, ook ’n kans kry om sy kleim af te steek.
Daar heers boonop steeds onduidelikheid oor die beserings van staatmakers soos Benni McCarthy en Kagisho Dikgacoi, wat in Engeland behandel word.
“As dit nodig is, sal ek daarheen vlieg om met die spelers en hul dokters te gesels, want dit sal ’n reuse-terugslag wees as hulle die toernooi moet misloop,” het Parreira gesê.
Intussen het die Suid-Afrikaanse rugbybaas, Oregan Hoskins, en Springbok-afrigter, Peter de Villiers, ook húl steun aan Bafana Bafana toegesê.
“Om aan dié toernooi deel te neem is baie spesiaal, maar om dit aan te bied is ’n ongelooflike voorreg,” het De Villiers gesê.
“Die span het hul spelpeil gelig tydens verlede jaar se Konfederasiebeker en ek is oortuig daarvan dat hulle, wanneer hulle in die eerste wedstryd in Soccer City uitdraf, selfs groter sal voel as Bakkies Botha.”
- Volksblad