Oranjes suur oor Spanje se ‘onwettige’ oorwinning
2010-07-13 10:37
In-diepte Verslae
Die regering het R10,2 miljoen opgedok vir ’n luukse suite om Afrika-staatshoofde en ander hooggeplaastes tydens die Wêreldbeker-sokkertoernooi te onthaal.
Meer Suid-Afrikaanse kunstenaars gaan by Fifa se Wêreldbeker-konsert by die Orlando-stadion optree, het vervaardigers gesê.
Den Haag - Die Nederlanders het ietwat suur gereageer op die doelpunt waarmee Spanje Sondagaand die Wêreldkampioen geword het.
Hier is ’n algemene konsensus dat die doelpunt onwettig was, maar terselfdertyd word tog erken die Spaanse span was eenvoudig beter.
Heelparty van die Nederlandse spelers was woedend vir die skeidsregter, die Brit Howard Webb. Hulle, hul afrigter, Bert van Marwijk, en heelparty sportjoernaliste meen Andrés Iniesta was onkant. Bowendien moes die Nederlanders ’n hoekskop gekry het pleks van die strafskop vir Spanje wat tot die doelpunt gelei het, meen hulle.
Maar, soos Van Marwijk self toegegee het: “Die beste span het uiteindelik wel gewen.”
In Spanje is die omstredenheid van die doelpunt ook ingesien. Die sportkoerant La Marca het toegegee dat Nederland ’n hoekskop moes gekry het, maar het ook gemeen – soos talle ander – dat die Nederlanders vuil gespeel en meer geel kaarte moes gekry het.
In Nederland en Spanje is uiteraard uiteenlopend op die uitslag gereageer. Spanje het van vreugde ontplof; in Nederland het aanvanklik ’n geskokte stilte op die eindfluitjie gevolg, maar toe het die mense tog partytjie begin hou – die drank was immers reeds betaal, en die verdriet moes verdrink word.
In die sentrum van Madrid het honderdduisende Spaanse geesdriftiges tot diep in die nag feesgevier. Selfs teen vieruur gisteroggend het jong mense nog in die strate gefuif.
Die koerant El País het 11 Julie “’n historiese dag vir die nasionale sport” genoem, terwyl die hoofopskrif in die Algemeen Dagblad was: “Nederland huil”.
Bly op hoogte van al die jongste sportnuus deur Nuus24Sport op Twitter te volg.
- Sport24