Nederland verf Kaap vir oulaas oranje met sege
2010-07-07 06:21
In-diepte Verslae
Die regering het R10,2 miljoen opgedok vir ’n luukse suite om Afrika-staatshoofde en ander hooggeplaastes tydens die Wêreldbeker-sokkertoernooi te onthaal.
Meer Suid-Afrikaanse kunstenaars gaan by Fifa se Wêreldbeker-konsert by die Orlando-stadion optree, het vervaardigers gesê.
Die Burger
Kaapstad - Die laaste keer.
Suid-Afrikaners het Dinsdagaand vir oulaas buitelanders in Kaapstad verwelkom vir vanjaar se Wêreldbeker-sokkertoernooi toe Nederland en Uruguay mekaar in die eerste halfeindstryd gepak het.
En niemand is teleurgestel nie. Die Nederlanders het hul plek in Sondag se eindstryd bespreek toe hulle die Suid-Amerikaners voor 62 479 toeskouers met 3-2 geklop het.
Met rustyd was sake egter nog gelykop en albei spanne se ondersteuners was erg senuagtig.
“Ons het begin huil toe Uruguay daardie doel inskiet,” het Pablo Varela en sy vriend, albei Uruguyane, met rustyd gesê.
Frenk Lamers, ’n Nederlander, het ’n knop op sy maag gehad. “Ek het die eerste doel verwag. Die tweede een het my nie so lekker laat voel nie. Nou drink ons maar ’n drankie om te kalmeer.”
Giovanni van Bronckhorst het die wenspan se rekening in die 18de minuut geopen, maar Uruguay se skerpskutter Diego Forlan het sake in die 41ste minuut gelyk gemaak.
Wesley Sneijder en Arjen Robben was ook in die kol vir Nederland voordat Maximiliano Pereira ’n troosdoel vir die verloorders behaal het.
Maar dit was nie net in die stadion waar mense partytjie gehou het nie.
Talle Suid-Afrikaners wat nié kaartjies gehad het nie het Dinsdagmiddag na die Lekkerlooproete gestroom om afskeid te neem.
“Ek weet nie hoe gaan die twaalfde (Julie, die dag ná die eindstryd) wees as hierdie verby is nie,” het Marie Botma (61) van Seepunt gesê waar sy langs die brug oor Buitengracht by Waterkantstraat gestaan het.
Ondersteuners sonder kaartjies het op pad na die stadion afgedraai en restaurante gaan soek waar hulle die wedstryd kon kyk.
En vir oulaas het dié met kaartjies op die paviljoene van die Kaapstad-stadion stelling ingeneem.
Van die begin af het die vuvuzelas elke goeie beweging, veral van die Nederlanders, luidrugtig begroet.
Van Bronckhorst en sy spanmaats sal in Nederland se eerste Wêreldbeker-eindstryd sedert 1978 speel. Hulle het toe met 1-3 teen Argentinië verloor en kon nog nooit Wêreldbeker-glorie smaak nie.
Hulle pak Sondag die wenner van Woensdagaand se tweede halfeindstryd in Durban tussen Spanje en Duitsland.
’Bom’ ontwrig Waterfront
Kaapstad. – ’n Gedeelte van die V&A Waterfront is Dinsdag ná 20:00 afgesper nadat twee verdagte sakke buite die Mitchell’s Brewery-kroeg gevind is.
Lt.kol. André Traut, provinsiale polisiewoordvoerder, het gesê ’n polisiehond kon nie bepaal of die sakke skadeloos is nie en die bom-eenheid het dit in ’n beheerde ontploffing vernietig. Die sakke was vol boeke.
Die gebied is gou weer vir die publiek heropen. - Thinus Dippenaar
- Volg Nuus24 op Twitter.
- Die Burger