Misdaad neem af tydens WB
2010-07-06 10:00
In-diepte Verslae
Die regering het R10,2 miljoen opgedok vir ’n luukse suite om Afrika-staatshoofde en ander hooggeplaastes tydens die Wêreldbeker-sokkertoernooi te onthaal.
Meer Suid-Afrikaanse kunstenaars gaan by Fifa se Wêreldbeker-konsert by die Orlando-stadion optree, het vervaardigers gesê.
Volksblad
Bloemfontein se rol in 2010 se Wêreldbeker-sokkertoernooi is grootliks verby, maar dit het bygedra tot ’n afname in ernstige misdaad wat moontlik hier is om te bly.
Volgens lt.genl. Amon Mashigo, Vrystaatse polisiehoof, het ernstige misdade in Bloemfontein en omringende gebiede tydens WB 2010 noemenswaardig afgeneem.
So suksesvol was die veiligheidsplanne rondom die toernooi, dat die polisie dit ernstig oorweeg om die strukture te behou wat die polisie en ander staatsdepartemente gevestig het vir die beveiliging van WB 2010.
Die polisie, departement van maatskaplike ontwikkeling, die verkeersdepartement en die plaaslike reëlingskomitee het kragte saamgesnoer om te verseker die toernooi in Bloemfontein is veilig vir almal en dat die stad se strate ook misdaadvry is.
Mashigo het Maandagoggend, in ’n eksklusiewe onderhoud met Volksblad, gesê hy was baie tevrede met die polisie se welslae tydens Bloemfontein se WB 2010-wedstryde.
Daar is byna geen ernstige misdade in die tydperk die grootste polisiekantore in die stad aangemeld nie.
Kol. Sam Makhele, provinsiale polisiewoordvoerder, stem saam. Hy het self verlede naweek gewonder of daar dalk ’n fout gemaak is toe hy deur Parkweg se voorvalle-register blaai en sien geen aanrandings of ander ernstige oortredings is aangemeld nie.
Die paar misdaadvoorvalle wat wel plaasgevind het, soos Japanse en Kanadese toeriste wat in die stad beroof is, was so gou opgelos dat Mashigo dink die behoud van verskeie aspekte van die WB-veiligheidsplan moet ernstig bespreek word.
Mashigo sê dit is veral belangrik om voort te gaan met sekere optrede, soos hoofweg-patrollering en verhoogde sigbaarheid van die polisie.
Dit sal hulpbronne verg, maar met voldoende beplanning behoort dit nie te moeilik te wees nie.
Hy sê die komitee wat gestig is om die toernooi se veiligheid te verseker bly vir eers bestaan. Hy hoop die Mangaung-munisipaliteit en ander departemente kan ook hul gewig agter die projek gooi.
Volgens Mashigo is misdaad slegs een van die simptome van dieper maatskaplike probleme. Dus hoop hy die departement van maatskaplike ontwikkeling kan ook voortgaan met sy werk om straatkinders en sekswerkers van die strate te hou en in die skool te kry.
Hy was ook vol lof vir die snelle afhandeling van sake in die sogenaamde Fifa-howe en sê hy hoop die regering besluit om dié aspek van wetstoepassing ook te behou.
Verder het die kringtelevisiekameras van miljoene rande wat regdeur die stad geinstalleer is, ook die polisie se taak aansienlik vergemaklik.
- Volg Nuus24 op Twitter.
- Volksblad