Laaste Kaapstad-wedstryd gaan bielie wees
2010-07-06 06:22
In-diepte Verslae
Die regering het R10,2 miljoen opgedok vir ’n luukse suite om Afrika-staatshoofde en ander hooggeplaastes tydens die Wêreldbeker-sokkertoernooi te onthaal.
Meer Suid-Afrikaanse kunstenaars gaan by Fifa se Wêreldbeker-konsert by die Orlando-stadion optree, het vervaardigers gesê.
Die Burger
Kaapstad - Ná jare van droom, beplan en uitsien na Suid-Afrika se Wêreldbeker-sokkertoernooi word die laaste wedstryd in die Moederstad Dinsdagaand gespeel.
Ten spyte van koue en nat weer wat vir Kaapstad voorspel word, gaan die stadion stampvol wees vir die eerste halfeindstryd wat tussen Nederland en Uruguay beslis word. Kuierplekke in die stad sal na verwagting ook vol wees.
’n Golf van Nederlandse ondersteuners in oranje sal die Moederstad na verwagting weer, soos toe Nederland net meer as ’n week gelede ook hier gespeel het, tref.
Onder die bekendes wat moontlik hier sal wees, is Mick Jagger, sanger van die Rolling Stones, en die akteur Leonardo diCaprio.
“Die Nederlanders wat by die huis sit, is baie jaloers op dié wat kaartjies het vir Dinsdagaand se wedstryd,” het Christoph Prommersberger, woordvoerder van die Nederlandse ambassade in Pretoria, Maandag gesê.
Die Nederlanders, wat met hul span se vorige wedstryd hier teen Kameroen in allerhande vreemde gewade soos oranje Elvis-pakkies geparadeer het, kom vanmiddag op die jolkol op die Parade bymekaar. Van 17:30 af sal hulle saam met duisende ander sokkergeesdriftiges op die Lekkerlooproete na die stadion begin stap.
Tussen 5000 en 10000 Nederlanders word verwag, het Wieke de Vries, ’n woordvoerder vir Nederlanders in die Wes-Kaap, gesê.
Die belangstelling in Dinsdag se wedstryd is só groot dat agt ekstra vlugte Maandag op die Kaapstadse lughawe geland het. Die vlugte het gekom van Amsterdam, die Seychelles, São Paulo (Brasilië), Montevideo (Uruguay), Dar es Salaam (Tanzanië), Addis Abeba (Ethiopië), Nairobi (Kenia) en Moembaai (Indië), het Deidré Hendricks, ’n woordvoerder van Acsa by die Kaapstadse lughawe, gesê.
Die jolkolle op die Parade en in Bellville, Swartklip, Khayelithsa en Vygieskraal maak Dinsdag om 13:00 oop.
Hulle sal ook Woensdag, wanneer Duitsland en Spanje in Durban teen mekaar speel, oop wees. Donderdag en Vrydag sal die jolkolle gesluit wees en Saterdag sal net die jolkol op die Parade oop wees. Sondag is al die jolkolle weer oop vir die eindstryd in Soccer City in Johannesburg.
- Volg Nuus24 op Twitter.
- Die Burger