Ghana is Afrika se laaste WB-hoop
2010-06-29 07:08
In-diepte Verslae
Die regering het R10,2 miljoen opgedok vir ’n luukse suite om Afrika-staatshoofde en ander hooggeplaastes tydens die Wêreldbeker-sokkertoernooi te onthaal.
Meer Suid-Afrikaanse kunstenaars gaan by Fifa se Wêreldbeker-konsert by die Orlando-stadion optree, het vervaardigers gesê.
Die Burger
Kaapstad - Afrika se oë gaan Vrydag vasgenael wees op Ghana – die vasteland se laaste hoop in vanjaar se Wêreldbeker-sokkertoernooi.
Dié Wes-Afrika-land sê Uruguay die stryd aan in Johannesburg om ’n plek in die halfeindstryd te beklink.
Ghanese in die Moederstad was Maandag vol hoop dat húl span Afrika se ster tot in die eindstryd sal laat skitter.
Jimmy Braye (37), ’n handelaar in die Kaapse middestad, is oortuig daarvan dat hulle tot die eindstryd sal deurdring.
“Ghana het altyd goeie spelers opgelewer en kan na die eindstryd deurdring op voorwaarde dat daar nie partydigheid van die wedstrydbeamptes is nie.”
Sy landgenoot, Anin Bodom (40), wat al tien jaar in Suid-Afrika woon, het verwag dat Ghana ver sou vorder in die toernooi. Elke keer as Ghana ’n doel aanteken, vlieg die SMS’e van blydskap rond tussen Suid-Afrika en Ghana.
“Wat my só trots maak, is dat Ghana uit al die lande op die vasteland so goed vaar.”
Vir Solomon Ackah (23), ’n skoenmaker, is dit eenvoudig: Die span is jonk en hulle het die ywer. “Natuurlik gaan hulle ons trots maak!”
Gabriel Nicoue (35), ’n abseil-tegnikus wat ook ’n konstruksiewerker by die Kaapstad-stadion was, se hart wil bars van trots. “Ek voel so goed om van die begin af deel te gewees het van die toernooi. Met toewyding en fokus kan Ghana ver vorder.”
- Bly op hoogte van al die jongste sportnuus deur Nuus24Sport op Twitter te volg.
- Die Burger