Geld kan dié Bafana-stryd kelder
2010-03-25 08:29
In-diepte Verslae
Die regering het R10,2 miljoen opgedok vir ’n luukse suite om Afrika-staatshoofde en ander hooggeplaastes tydens die Wêreldbeker-sokkertoernooi te onthaal.
Meer Suid-Afrikaanse kunstenaars gaan by Fifa se Wêreldbeker-konsert by die Orlando-stadion optree, het vervaardigers gesê.
Timothy Molobi
Porto Feliz - Bafana Bafana se voorneme om hul Wêreldbeker-voorbereiding teen die sokkerreus Argentinië af te sluit, kan weens ’n voortslepende geldgeskil skipbreuk ly.
Die Suid-Afrikaanse Sokkervereniging (Safa) weier glo om Diego Maradona se span ’n stewige wedstrydbedrag van $1,5 miljoen te betaal om in Mei teen Bafana in die splinternuwe Soccer City-stadion in Johannesburg te speel.
Die afrigter van Bafana, Carlos Alberto Parreira, wil die wedstryd teen Lionel Messi en Kie. gebruik as ’n kleedrepetisie vir die Suid-Afrikaners se eerste WB2010-kragmeting – op 11 Junie teen Mexiko.
Safa en die Argentyne kan steeds nie tot ’n vergelyk kom nie.
Parreira het gister ook die sluier gelig oor die planne vir die tweede van Bafana se drie Wêreldbeker-oefenkampe, aanstaande maand in Duitsland.
Dié Brasiliaan beoog dat sy span teen Finland en China speel nadat Bafana hul Suid-Amerikaanse safari op 30 Maart teen Paraguay afsluit.
Die Finne word geslyp deur Stuart Baxter, ’n oud-Bafana-afrigter.
Die Suid-Afrikaners het reeds in ses oefenwedstryde gespeel en pak Ponte Petra môre in die Academia Traffic De Futebol-kompleks net buite Sao Paulo nadat die wedstryd teen Desportivo Brasil na Saterdag geskuif en die stryd teen Palmeiras afgelas is.
“Hoe meer wedstryde ons speel, hoe meer kans het ek om na die spelers te kyk en te besluit oor wie in my eindelike span gaan wees,” het Parreira gesê.
“Die enigste manier waarop jy regtig dié besluite kan neem, is om die spelers in wedstrydsituasies te beoordeel – daarom speel ons soveel wedstryde.”
Volgens hom kan die beplande wedstryd teen Argentinië sy span ook help om voor ’n stampvol stadion te speel en hulself te meet teen een van die wêreld se voorste spanne.
“Om Messi na Suid-Afrika te bring, sal belangstelling aanwakker en vergoed vir enige geldelike eise.”
)?Intussen begin Bafana Bafana die vrugte pluk ná die eerste twee weke van die oefenkamp hier.
Die spelers het aan die begin gekla dat hulle te hard gedryf sou word deur die fiksheidafrigter, Francesco Gonzalez, maar nou geniet hulle die strawwe oefeninge.
“Dit wás hard, maar ons fiksheid het verbeter,” het Daylon Claasen van Ajax Amsterdam gesê.
- Sport24